محجوبة جزائرية تقليدية أصيلة من عند ريونةفي خاطر اخيتي ملكة سبأ

[ندعوك للتسجيل في المنتدى أو التعريف بنفسك لمعاينة هذه الصورة]

جبتلكم اليوم محجوبة جزائرية تقليدية تع امهاتنا وجداتنا ربي يبارك فيهم ويحفظهم
وهي المحجوبة لمدورة الرقيقة ليست المودرن المطبقة ههههههههه
وكان طلب من اخيتي ملكة سبأ لما قلتلها نعملها مدورة

نبدأ بالتحضيرات اولا نوجدو الدقيق قد ما يكفي للعائلة ونعجنوه بالماء والملح فقط ونخلوه يتبت يعني يتحط شوية
وبعد ربع ساعة ولا 20 دقيقة نرجعولو نعجنوه مليح
[ندعوك للتسجيل في المنتدى أو التعريف بنفسك لمعاينة هذه الصورة]
ونوجدو الحشو ليهو غير بصل مع حبتين طماطم مش كثير لأنها تطلق ماها وتقدري متعمليهاش انا امي مدرهاش خلاص
تعلمتها من حماتي وتزيدي ثوم مهرس مع فلفل اخضر حار ولا ترحيهم كيما تحبي وداويها براس حانوت وفلفل حمر مرحي
نشفي ماء البصل على النار قبل مديري الزيت والا حبيتي زيدي زرودية وبطاطا مرسيهم في الحشو بعدما تغليهم
انا منديرهمش منحبهمش هذي طريقة حماتي ومتنساوش قطع الشحمة تزيد في البنة
حطي الحشو كله يذبل على النار و مبعد نحيه يبرد
ومن الاحسن البصل تع الورق تجي ابن انا خليت غير شوي حماتي مسافرة لوكان هي لي دارتها كان راهي خلات الورق ياسر هههه
وزيد البصل تع الورق يتقطع باليد احسن انابرك لا استطيع التقطيع بيدي بسبب عمليتي
[ندعوك للتسجيل في المنتدى أو التعريف بنفسك لمعاينة هذه الصورة]
والحشو مندير فيه لا زيتون ولا لحم مرحي ولالالا فقط الحشو الخاص بيها باش نحس انها اكلة تقليدية
[ندعوك للتسجيل في المنتدى أو التعريف بنفسك لمعاينة هذه الصورة]
بعدما نعجنوه مليح لوزوه ونخلوهم يتحط كذالك شوية باش يتلاح مليح
نقرصو وحدة تقراص متوسط خطراه تزيد تتحل في يدك
ونكونو موجدين الاخرى فيها لصوص لصقوهم مع بعض ونضم الجوانب بالاصابع مليح باش متحلش
لأنك الا تقدري زيدي حليها بيدك هذي طريقت جداتنا وامهاتنا
[ندعوك للتسجيل في المنتدى أو التعريف بنفسك لمعاينة هذه الصورة]
حاولت نصورلكم طريقتي في نقلها للطاوة وطريقت حلها شوية في اليد لكن لما جا يصور ولدي حكمني بكل هههههههههه وليت مسحتها
[ندعوك للتسجيل في المنتدى أو التعريف بنفسك لمعاينة هذه الصورة]
هذي نتاعي نطيب وناكل منصبرش خطراه كون تبرد تروح البنة ونحبها سخونة ومقرمشة
وراني مزوقتلكمش المائدة خطراه عندنا لي طيب تتكل مع كاس قازوز وطبق وراوح
[ندعوك للتسجيل في المنتدى أو التعريف بنفسك لمعاينة هذه الصورة]
وهذي لجارتي بنتها شافتني نطيب وتعرفو عاداتنا كي واحد يشوفك طيبي لازم يذوق
ولي تجاوب الاولى تاكلهما بصحتها
[ندعوك للتسجيل في المنتدى أو التعريف بنفسك لمعاينة هذه الصورة]
وفي النهاية حبيت نقلك بعض تسمياتها
محجوبة,محاجب,مطابيق,مختومة
واذا عندكم اسامي اخرى اذكروهم
انا نقول محجوبة وحماتي مطابيق وجيراني مختومة
[ندعوك للتسجيل في المنتدى أو التعريف بنفسك لمعاينة هذه الصورة]

السلام عليكم ممممممممممممممممم يعطيك الصحة وسلمت يداك حنونتي بارك الله فيك

يا سيدي عندي الزهر المحجوبة في خاطري .....

ما شاء الله عليك أخت ريونة ...سامحيني أختي في تعبك وانتي مدايرة عملية على يدك ...ان شاء الله

ربي يخليك ويجعلها في ميزان حسناتك ويشفيك ويعافيك

المحجوبة لمدورة نسمع بيها وكي لقيتك تعرفيها قلت نتعلمها ...

ما شاء الله راهو منظرها يشهي تاع الصح ...كون جات قدامي ما نخلي والوووو

ربي يحفظك و ينورك .....يسلمووووووووووووو عزيزتي

تسلمين

:سلمت يداك: :سلمت يداك:

سما هدا حقيييييييييييييي اليوم رانا تفاهمنى على لفطور انا تاني درتها في باتنة نقولولها محجوبة

واهل راجلي في النعامة يقلولها خبز الشحمة ولا لمخلع انا تاني شوفي طريقتي

بارك الله فيك اختي ريونه محجوبه و عليها الكلام يعطيك الصحه :( بصحتك ملكه سبأ راني غرت منك محجوبه على خاطرك

مشكورةةةةةةةةةةةةةةةةةةةةةةةةة روعه تهبل

:سلمت يداك: :سلمت يداك: :سلمت يداك: :سلمت يداك: :سلمت يداك: :سلمت يداك: :سلمت يداك:

امممم.... ريحتها و بنتها راهي في فمي..... بارك الله فيك

ماما ثاني تديرها مدورة.. يعني تاع الي قادرة شقاها مش مطبقة كيما تاع اليومين هذوا

لكن الدواء تديرو فوق الطبقة الأولى فوق الطاوة تاع الطياب..

يعني تعمل الطبقة الأولى.. لما تبدا تشيح تقلبها و تحط الدواء مباشرة عليها و من بعد تحط الطبقة الثانية تاع العجين.... لما الوجه الأول يطيب مليح.... تقلب الكل باه يطيب الوجه الثاني.. يحب خفة و مهارة

أنا طريقة ماما تجيني صعيبة.. كي نجي نقلب...هههههه ... يخرجلي الدواء و نخلط الحالة...

أمالا عدت ندير المطبقة و خلاص... و لقيت البنات كامل يديرو فيها.. قلت علاه نكسر راسي.

بصح بيني و بينك... المدورة أحلى و أبن.

بارك الله فيك ريونتي.... محجوبة و عليها الكلام...

هكا نحبك.. تلقاي فرصة تصوريلنا ما تراطيهاش...

اممممممممممممممممم محجوبة و عليها لكلام تشهي ماشاءالله حبيبتي ريونة و بصحتها حبيبتنا ملكة السبا والله تستاهل كل خير ...........تكلوها بالصحة و الهناء و طريقة التحضير رائعة و لازم تكون السرعة في حملها للطاوة ههههههههه مع دائرية مشكيتش كامل تلحقلي بالطاوة اكيد رايحة اطيحلي في الارض ههههههه .......بصحتكم حبيبتي

حنا نقولولها محجوبة

اممممممممم ربونة يعطيك الصحة على المحجوبة تبان تشهي اممممممم

احنا ثاني نديروها ونقولوها المغلووووقة وكنت حطيتها من قبل في المنتدى اختلاف بسيط فقط لكن مرة سلفي تديرها بطريقتك نيشان تحط واحدة وتزيد فوقها الاخرى و كنت جربت طريقتها غير هذا الاشبوع ورائعة جدا واحنا ثاني ما نديروش فيها الطماطم تاع الحب غير تاع لبايط برك ونديروها بالبصلة تاع الورق فعلا تجي بنينة مع فلفل أحمر يابس اممممم ما نقولكش وزرودية لازم وشحمة

يعطيك الصحة ريووووووونة توحشنا اطبقاك يا الغالية ولا كي راحت عجوزتك خذيتي راحتك في التصوار هههههههههههههه

احنا نسميوها مغلوووووووووووووووقة وفي ادرار يسميوها خبز الشحمة

امممممممممممممم يعطيك الصحة يا الفحلة محجوبة تاع حراير

حنا ثاني المحجوبة لازم تكون مدورة

وبصحتها العزيزة ملكة سبا

بارك الله فيك اختي ريونة الشاطرة ....ربي يسلم هاذوك اليدين محااااااجب و عليهم لكلام سخفتيني امممممممممممممممم
ان شا الله نجربهم عن قريب

يعطيك الف صحة وعافية ريونه محجوبه مدورة على اصولها والبنه امممممممممم شوي وندخل في الصورة ناكلها ... بارك الله في ايديك بالشفاء عليك ما كنتش عارفه بلي دايرة عمليه ليدك ....ان شاء الله نطبقها وتشوفي تطبيقي بصح نتعلمها قبل :)

راكوا سخفتوني تاع الصح اليوم قاعكم اتفقتوا على المحاجب وانا كنت حابا نديرهم البارحة لكن ما لقيتش البصلة عندي بالزاف غدوة ان شاء الله يصرف زوجي ونطبق تاعك ريووووووووونة بحذافيرها وانتظري تطبيقي والصور

بارك الله فيكم والله فرحت بردودكم
ههههههههه ملي طرحت الموضوع مزدتش طليت اولا محجوبتي ليوم طولت مع التصوير
وزيد تحميل الصور والكتابة عليها ثاني يحكم كثير الوقت وانا اشغالي كثيرة
لهذا بعثت وخرجت مباشرة ههههههههههه
المهم شكراااااااااااا لي كل من ردت على محجوبتي
الصورة لي حبيت تظهر هي طريقة حملها لأني تعودت من الصغر نحملها من مكانها الى الطاوة بدون ميسيحلي الحشو
الا اذا العجين مرخوف ياسر اكيد راح تسيحلك لازم يكون محزوق على تاع الرقاق العادي شوية
لكن ولدي معرفش يصور

[ندعوك للتسجيل في المنتدى أو التعريف بنفسك لمعاينة هذه الصورة]

lمش عارفة اذا فهمتي طريقتنا ولا لا..؟؟

اممممممممممممم سخفتيني تبان بنيييييينة
يعطيك الصحة ريحتها وصلتني هههه

:( :o :( مشاء الله بسم الله
بصحتك يا روينة محجوبة انتاع الصح
سلمت الايادي يا حبيبتي :o :( :o

سموحة فهمتك لكن مش كيما نشوف هههههههههههه
ايا قولي لأمك طيبها وصوريالنا خلي نزيدو نتعلمو طرق أخرى للمحجوبة

[ندعوك للتسجيل في المنتدى أو التعريف بنفسك لمعاينة هذه الصورة]

يعطيك الصحة يالفحلة محجوبة وعليها لكلام الله الله
انا طريقتي كيما ام سموحة ربي يحفظها
ان شاء الله نجرب طريقتك ونصورلك طريقتي انا تاني نديرها مدورة وزوجي ميحبش المطبقة كاريات
يقولي معجنة هههههههههههههه

يعطيك الصحة ريونة محاجب شابين سخونين و حارين ملاح في هذا البرد

نور هدى كتب:: سما هدا حقيييييييييييييي اليوم رانا تفاهمنى على لفطور انا تاني درتها في باتنة نقولولها محجوبة

واهل راجلي في النعامة يقلولها خبز الشحمة ولا لمخلع انا تاني شوفي طريقتي

بارك الله فيك نور الهدى اول مرة نسمع المحجوبة اسمها كذالك لمخلع
والصورة لم تظهر تمنيت لوانها ظهرت نشوف محجوبتك

[ندعوك للتسجيل في المنتدى أو التعريف بنفسك لمعاينة هذه الصورة]

ريووووووووونة راني طيبتها المحجوبة تاعك لكن ما صلحتليش مدورة بالزيت جيت نهزها تثقبت ايا قلبتها كاري ههههههههههههه انا موالفة نديرها مدورة لكن ندير لتحت الفرينة ماش الزيت ياليت توريلنا مرة أخرى كيفاه تهزيها وتحطيها في الطاجين

اريج الورد كتب:: ريووووووووونة راني طيبتها المحجوبة تاعك لكن ما صلحتليش مدورة بالزيت جيت نهزها تثقبت ايا قلبتها كاري ههههههههههههه انا موالفة نديرها مدورة لكن ندير لتحت الفرينة ماش الزيت ياليت توريلنا مرة أخرى كيفاه تهزيها وتحطيها في الطاجين

هههههه معليش المرة الجاية حاولي شوفي نقلك طريقة متكسريش راسك خاصتا الا زوجك يقبل الكاري
بصح كل من ديري محجوبتك لوحي وحدة مدورة حتان تتعودي
خسارة انا الصورة مسحتها لواني خليتها وتركت فقط مساحة القرصة
المهم تعلمت من حماتي كسرة الشحمة وهي بنفس الطريقة غير لصوص شحمة وطماطم وحار و ثوم طبعا للياكل الشحمة والبنة روووووعة
كي نديرها نصور طريقة نقلها الى الطاوة

[ندعوك للتسجيل في المنتدى أو التعريف بنفسك لمعاينة هذه الصورة]

يسلم هادوك اليدين لدارو هاديك المحجوبة
والله غير تشهي ان شاء الله نجرب طريقتك ونحطهالك تشوفيها

» محجوبة سوق هراسية بانامل بسكرية\من مطبخ ليلى زهرة الرمال
» مسمن جزائري من ايداي جزائرية في خاطر صمت الجزائر
» محجوبة تاع الخميرة لي متعرفهاش تدخل