قولينا كيفاه تمشي أمورك المادية؟؟

[size=24]
قولينا كيفاه تمشي أمورك المادية؟؟


بسم الله الرحمن الرحيم

المرأة الصالحة

ذكية ف تعاملاتها المالية . و تخمم دايما كيفاه توفق بين مدخول الأسرة و احتياجاتها و تحوس توفر شوي

للظروف و شوي باه كش ما يديرو يا دار يا طونوبيل...أو أثاث و

مع غلاء المعيشة .... لازم الوحدة تصرف بذكاء

كاين لي بحاجة قليلة تمشي أمورها.. و كاين لي على الرغم من المدخول المليح ماتلقاش روحها

كل وحدة تقولنا كيفاه عاملة ميزانيتها و تعطينا أفكارها ف حسن التدبير مثال

مصروف الماكلة و القش كيفاه, المناسبات لي يجيو و يديو واش حاولت توفري, التحواس....


كل وحدة تحاول تعطي فكرة عملية لحسن التدبير

ولا رد

الحقيقة ومع غلاء المعيشة الواحد صار يعمل الف حساب للغد انا الحقيقة ليس لديا علاقة بالجانب المادي يعني انا احاول اساعد زوجي من خلال سياسة التقشف او بالاحر اقتصادية ليس معاناه انني شحيحة ولكنني استطيع ان اتخلى اشياء ممكن تكون كمليات بمعني نحاول نكمل الشهر من غير ما نحتاج لاحد وايضا النظر للمستقبل والحمد لله لا احتاج لشيئ سوى ان اكون اما

شكرا على الموضوع لان فعلا مهم بالنسبة لميزانية الاسرة وباربت الاخوات يفيدنا بتجربتهم

هههههههه موضوعك هايل ام سلسبيل اه ياختى واش نقولك كلشي عاد غالي ولحوايج ولو شابين بزاف


وعينينا تحلو بزاف لتشوفيها تقولي نشريها ههههههههههه ولتحط عليها يدك تحرق


هههههههههههه بصح انا عندي جماعتي جماعة البارفاسيليتي ههههههههههه في لمعان ولفرشات والقش

ههههه نتفاهم انا وراجلي ونجيب كيما درك راني مشربكتها وحد التشربيكة ربي يسلها على خير

ونعاود نقول وناكد كلشي والمفاهمة مع الراجل هوما ربي يكون في عونهم واحنا تاني ربي يكون في عونا

هاد جبب وهاد لفرشات يما يما صح كي يقولك مايملى عين لبندام غير التراب

خخخخخخخخخخخخخخ ام سلسبيل انا راني زيرو في التدبير لاعلاقة غير نشري لكن راح نستفيد من الاخوات لانك والله تقولي طليتي على قلبي


لي عودة باذن الله اذا متودرتش

موضوع مهم مع غلاء المعيشة و تزايد طلبات الاسرة و في المقابل نجد ان الدخل محدود
اصبح التدبير و التفكير في الميزانية الشغل االشاغل
بالنسبة لي نشريو القضية تاع الشهر من سكر قهوة حليب معجنات .. .....طماطم منظفات.......
الي يكفي للشهر ليستا كاملة............ ثم ليكوش تاع البيبي.........ثم الحليب تاعو ..........
زيد نحي مستحقات الماء الغاز التريسيتي الهاتف الانترنت على الاقل النصف كل شهر ..........
المصروف الاسبوعي مضروب في اربعة زيد نحي للقش لدراري مناسبات اعراس او باروك او زيارة مريض...
المهم ساعت يبقى واش نخابيو ولكان مرضنا و رحنا لطبيب راح كلش ......
........و الحمد لله........... ربي يوسعلنا في الرزق و يبارك فية يارب...............

السلام عليكم الحمد لله انا عاملة وزوجي كدلك هو متكلف بكل مصاريف الاكل والشرب والكهرباء وانا من نفسي نحب نشري الاواني الملابس الالعاب لابني انا بطبعي احب التسوق كثيرا احيانا اشتري اكثر مما نحتاج كل ما يعجبني شيئ نشريه انشاء الله تفيدونا بافكار في الاقتصاد والتسيير

خخخخخخخخخخخخ الحمد لله على التفاعل
نفس المشكل معايا عندي مانشوفش خير ملي نشوف
كلش يعجب ويسخفو عينيا هادو ماعن هادا فراش هادي لبسة ممممممممممم
على اللبسة قاع مانملش خخخخخخخخخ
تحب التغيير والتجديد وخاصة الصالون و المطبخ والحمام وكل شيء طبعاااا
ربي يهدينا ونحكمو يدينا شوية
انا راجلي درنا كل الطرق
يخلص 5ملاين
يصرف مصروف الشهر=من مصروف الدار مواد غذائية ومواد التنظيف وليكوش ومايخفاش عليكم الخظرة كل اسبوع
مليون
واذا كان في فواتير تاع الماء والغاز والكهرباء يخلصهم مثلا بيناتهم 500الف كل 3 اشهر
والباقي مايجبدوش كي نحتاجو يجبد قيس مانحتاجو
وهاكدا والله لقينا روحنا شوية خير ملي كنا نجيبوهم لدار ونولو غير نجبدو خخخخخخخخخ
اما بنسبة للكراء :مريض: ااااااااااااه على الكراء يخصص شهرين باش يخلص
وانا يمدلي مليون كل شهر ليا قالي راكي تكونسومي بزااااف دراهم انا لمليون في عوض نروح نشريه هاك وهاك لالا نخبي مليون على مليون وندير ذهب 8)
هاكدا باش كي ندير سكنة نبدى نجبد ونشري واش يعجبني

والحمد لله على كل شئ ربي يخليلي لحكومة وبنتي بيلا يارب

عندك الحق فيما تقولينه أختاه بارك الله فيك على تنويرنا

أنا مازلت عند بابا....

يعني مازلت مانيش نتصرف في الميزانية...ههه

بابا و ماما كان همهم الأول هو توفير الأكل و الصحة و اللباس و خاصة التعليم..

يقولنا المهم كبرتكم و قريتكم و تخرجتوا كامل..

أنا عن نفسي.... اذا خرجت... سواردي يطيروا... نشري وش يعجبني... و نموت على الشوبينغ..

لأني نرفّه بيه على روحي من تعب الخدمة و الروتين.

لكن.. مليح الواحدة تعمل ميزانية.. وش تصرف و وش تخبي... و لازم تصارح روحها

الناقص... هل هو ضروري أم من الكماليات...؟؟

نقدر نستغني عليه أو لا..؟؟

مش تصرف بلا تخمام و بلا هدف...

أنا مؤخرا.. عدت نكتب وش ناقص في البيت... و نخرج على جالهم.. واذا نلقى حاجة مليحة تستاهل و عجبتني .. نخطفها في طريقي.

والي نشريها نشطبها من القائمة.

الذهب... راح يوخّذ.... عاد لازملو الشهرية كامل.. مش نوفروا منها...
و الي دار الذهب داروا بكري...هههه

ساعات نخطف حاجة مليحة تعجبني... لأني جربت الذهب بالتقسيط... و ما عجبتنيش.
نتفاهموا على مبلغ... ومن بعد في الأخير يزيد فيّا و يقولي الذهب زاد...

قلت ما نزيدش نعاودها.. تكلحت مرتين بزايد.


المهم..

كي يرزقني ربي بزوج صالح.. و ندير ميزانية خاصة.. راني نطبقها ان شاء الله.... 8) 8)

اه عالمادة الى مدوخة الكل ربي يرزقنا كامل
**** نرجع نتكلم عالميزانية انا ساكنة في دار بابا يعني منصرفش غير كشما نجيب حاجة زيادة ديسير ولا حاجة هك
المهم انا شهرية بابا لباس عليها الحمد الله يا ربي مكفية متخلينيش نعاونو راني ندير لذهب لخواتاتي الزوج لانهم صغار نحبهم يلقاو الذهب
زيييد انا كيفاه ندييير نجيب لي بلوف ونكتب على كل واحد عنوان ونحط فيهم مصروف
انا لاقية روحي لاني في دار بابا منصرفش ايا واش ندير بصواردي نشريلهم ذهب انا كملت روحي وزيد الذهاب ميزدلكش اذا زاد الذهب معناها منيش كي سموحة هههه


اما اذا زوجت راح يتبدل لحسااااااااااااااااااااااب

ايييييييييييييييييييييييه تفكرت اني راح نشري طاكسي
قولولي ان شاء الله

ربي يزوجكم ههههههههههههههههههه وتعودو تتمسئلو ونتعلمو منكم يالفحلات ومبروك الطوموبيل يالسكر

والعسل

ههه

سهير.... أنا راني نبروفيتي في طاكسي خويا... مدايرة راي فيها...

أما بالنسبة للذهب... الصايغية تاوعكم مالا مايزيدولكمش في قيمة الغرام كي يزيد..؟؟ خير..

من المفروض هكذا...

و عدت نشري كاش وخلاص... شد مد...

ان شاء الله تفرحينا سكرتي و تقوليلنا درتي فيه طاكسي.... ألف مبرووك مسبقا... و ربي يسهلك ان شاء الله.

شكرا ليكم سكرتي وسموحتي والله فرحتوني بردكم
ان شاء الله يلاقيكم ربي بوليد الحلال اللي يستاهلكم
اما لذهب والله توقاف مال راني نخبي لبنتي باش تلق روحها في الكبر خير ملي نشريهم
حوايج يروحو
سكرة ان شاء الله ربي يحققلك واش تتمناي انتي وسموحة وجميع لبنات
والي كذالك ادعولي خخخخخخخخ

انا لحد الان مازالني في دار بابا يعني يعيد عليا الميزانية

مي من ناحية التصرف في البيت الكل اجمعو بلي نعرف نقس ونخلي للبيت ميزانية باش نخبو شويا كاش ما نديرو بيهم
اما بالنسبة للتخبية تاع الدراهم انا كنت كل مايطيح عندي الدراهم نلاقيهم راحو تم تم لكن هادو عامين راني بديت نخبي وكل ما نلاقي مبلغ لاباس بيه نلوحه في الدهب هاكا يبقا توقيفة ماشي تشري حاجة تلبسيها مرة ولا زوج ومن بعد طيشيها هههههههههههههههههههه

شكرا اخوات على المعلومات و على النقاش المهم
راني معاكم مانقدرش انخبي الدراهم لاني من اكثر الناس يصرفوه
ياربي نحاول نخبي و لكن في سنة 2013 ان شاء الله...........ان شاء الله

أنا كنت مسيرتها ب11000دج،فتخيلوا......................
والآن رانا ناكلو بالدين لأن الخلصة ما زال ما يرسلوها
ما غاديش تكون 11000 كيما كانت ولله الحمد ولكن عندنا دين كبير وعلينا أن نتدين دين كبير آخر من أجل السكن
راها مخربطةغير سكتوا وبرك
ربي يسلكها

روعة المهم فى هدا انه يكون زوج و زوجة متفاهمين وربي سبحانه يمهل ولا يهمل انا حكايتى مع امور المادية يعنى شوى شوى كيف قبل زواج كنت نعيش عند خالتى زوجها وهى يعملو امورهم المادية لحد الان الحمد لله كنت نلس كيما نحب و ناكل كيما نحب والعطلة تمر ما شاء الله كل مرة فى ولاية سياحة من بلادنا يعنى منعرفش فى امور مادية اى شئ لما تزوجت كنت حاسبة نعيش كيما كنت عايشة لكن زوجى وظيفتو على قدو وامور المادية كانت مع اول صعيبة وانا ما تاقلمتش مع الوضع وما كنتش نعرف فى مال ولا اى شئ كل همى انه نلبس ونحوس وناكل مليح وووو غيرو لكن زوجى قالى يا تعيشى على حسب ظروفى يا تشوفى حل اخر وبشوى بشوى وبديت نتنازل على بعض اشياء لى كنت نشوفها لازم فى حياتى وتحكمنا فى مصروف ودرنا سيارة على قدنا وكنت سعيدة بيها جدا رغم انى ركبت اغلى ماركات بصح لى دارها زوجى كنت نحس بسعادة وانا نركبها ورانا ساكنين فى مسكن عمل و نخمو باش نديرو سكن خاص بينا ودعواتكم اننا ننجح فيه واهم شئ فى هدا انى ما بقيتش انانية نخمم غير فى روحى ونقول يدبر راسو بالعكس معاه خطوة خطوة وربي يوفقنا ونكملو مشروع السكن ودعواتكم معانا باش نكملوه

كملي حبيبتي شوقتيني يالله استبرق وراني توحشتك ياسر
على بالك راكي درتيلي لكوراج
خصوص اني ماعنديش سكنة

بارك الله فيك على هذاا الموضوع أنا ماذا أحكي هل أحكي على خيبتي؟ أنا عنما كنت عندي غير مخول واحد كنت نقول إن الدراهم قلال لكن
الأن بنتي تشتغل وتعطيني كل راتبها ولكن المشكل نفس المشكل وإكتشف إن الخطأ في أنا وسوء التصريف وليس نقس الدراهم فهل من واحدة تساعدني وتعطيني الحل أرجوكم

موضوع هايل ان شاء الله البتات يرفعوه ونتبادلو الخبرات