تجمــــــــــع المتزوجــــــــــــات بعيدا عن الأهل

احب اني انكون من الاوائل اللي اردو على الموضوع اللي رانا انعانيو منو الكل
لكن انا عندي مدة 18 سنة زواج اتغلبت عليه ذرك والحمد لله
انا كنت مع الاول ماقدرتش نتواصل في المنطقة اللي اتزوجت فيها رغم انها في نفس الولاية وتبعد غير 45 كم على اهلي لكن مع الاول كانت الظروف ماتسمحش باه انروح عندهم ديما كنت انروح من شهر ولا شهر ونص بصح كي انروح مانكذبش عليكم حتى انحي الوحش 15يوم خاصة اني كنت وحدي في البيت مع الشيخ والعجوز فقط والله كنت نقضي يومي في الغرفة محبوسة لا تلفزيون ولا تلفون ولا احد اتكلم معو حتى اروح زوجي من الخدمة ...وقتاش نلقى شوية متنفس كي اجو سلافاتي راني انحي شوية ونحي بزاف كي اتجي سلفتي الصغيرة بحكم انها هي ايضا عايشة بعيد على اهلها وكنت نشغل روحي مع الاول ياشغال طرز باليد او الرسم على الحرير ولا فتلة يحكمو اخواتي خدمة ويبعثولي نعاونهم المهم حتى اجتزت هذ المرحلة يعني لازم كل وحدة فينا اتشغل نفسها بحوايج باه ماتخليش الحزن يدخل قلبها يعني لازم ماتخليش راسها يشتغل بزاف لازم اتشغلو هي على حسابها اذا اشتغل وحدو راح اتحس بالملل والكئابة انا هذا رايي وهكا اجتزت المرحلة هذي وراني والحمد لله راني لاباس وعدت مانحبش انغادر وين نسكن ذرك بزاف عدت كي انروح وين اتربيت ثم اللي عدت انحس اني غريبة
اذن نصيحة ماتخلوش الملل والكلل يتفوق عليكم بالعكس لازم اتشغلو روحكم باه انتم اللي تتغلبو عليه

يعطيك الصحة حبيبتي فسحة أمل على هذا الموضوع راكي طحتي على الجرح صراحة أنا عندي هذا العام الرابع من زواج ومازال مولفتش هذي الغربة وأنا بعيدة جداجدا عن أهلي ونهارات من لوحش نكره باه نخدم شغل بيتي ونتقلق بزاف نحس روحي رايحة تخرج ومعنديش حاجة نسلي بيها نفسي غير النت ونهارات نكرها ونشد لمخدة ولفراش ونقول للبكي حتان يعود راسي راح يطرطق نتمنى من أخوات لعندهم تجربة يفيدونا وجزاك الله كل خير حبيبتي فسحة أمل

ايييييييه الغربة اصعيبة حنونة انا غير اهنا 45كم وما قدرتش انشد حتى انا المخدة ونعطيها بكا حتى يتنفخو عينيا ربي اكون في العون حبيباتي كل من هي بعيدة بزاف على اهلها ربي اصبركم على الغربة

اولا بارك الله فيكي
انا كون تعود عندي طفلةما نزوجهاش بعيد الا اذا سبق المكتوب الله غالب المهم ندير المستحيل
انا اصغر فرد في عائلة متكونة من 8 افرد زائد ابي وامي ربي يحفضهم
وانا جد متعلقة ياهلي وخاصة امي واخواتي البنات كانت امي تقلي نزوجك امام المنزل باه كي نتوحشك طلي عليا من النافذة بصح خسارة جارنا مازال صغير هههههههههههههههههههههههههه
المهم تزوج في العاصمة وانا من سطيف قالك خبز الدار ياكلو البراني
عانيت الامرين في البداية الم الغربة الم فراقي على امي وكذللك عقلية جديدة ونحس روحي ما نيش مقبولة بيناتهم كنت اي خبير انا لي نوصل ليه متاخرة وعندي مدة خمس سنوات زواج اكثر شيئ يؤلمني هو لمة العيد في بتنا حلو وخاصة نحن عائلة كبيرة ويوم ثاني عيد نجتمع كامل حواي 30 فرد وانا ياحسرى عليا عمري ما نصبر على بعاد امي لميمة لحنينة

أختي مريم والله غير بكتيني نفس شعوري في كل المناسابت لبنات مجتمعين في دار والديهم وأنا دمعة بين عينيا وش نقولوا غير الحمد لله وربي يصبرنا على فراق والدين

ربي يكون في عونكم بصح الغربة مهيش سبب للحزن والله كون جاء ماعندكمش ولاد ومش متغربين رح تعيشوا في تعاسة ايام العيد تلقاي الكل عندهم اولاد ولابسين وخارجين وانتي قاعدة في فراغ من جميع النواحي رح تصماط عليك الدنيا وتبقاي في عزلة وحال ابرك من حال صراحة نتمنى روحي ساعة نكون في غربة بصح يكون عندي اولاد لانه مش رح يدوملك حتى واحد غير زوجك واولادك ولكن الله غالب

اه من الغربة الغربة صغيبة ولى ماجربهاش مايحسش بيها
وخاصة فى المناسبات تحسى انك غريبة فى المكان لراكى فيه
وانا عندى 12 سنة وانا متغربة على اهلى وناسى
الحمد لله ضرك الوسائل متوفرة قربت المسافة شويا خير من والو من الهاتف والسكايب وانا لازم كل يوم نهدر مع امى واخوتى ومانقدرش نفوت يوم بلا ما نهدر معاهم
والحمد لله رانى مع زوجى واولادى وربى يحفظهم ويخليهم امين
شكرا استبرق على الموضوع

بارك الله فيك حبيبتي فسحة امل على الموضوع القيم وارلائع وكيما قالت ام محمد امين راكي حطيتي على الجرح انا عندي اربع سنوات هنا في ورقلة واهلي في الجلفة والمسافةبيناتنا 500كلم .....مام عندي النت والسكايب والهاتف نكلم امي كل يوم مستحيل يفوت نهار وبعض المرات من النوم نكلمها قبل مانفطر ومع ذلك منقدرش نحكيلها كلش نخاف نديرلها القلقة وهي بعيدة حاولت اني نتجاوز ونوالف لكن اجد الامر صعب مشكلتي ليست في البعد فقط وحتى زوجي له دور كبير في هذه الحالة يخرج من الصباح ويرجع بالليل طوووووول للنوم التواصل مكانش حتي بناتي حسو بغيابو ..................اين اجد الحل فسحة امل









....

انا المي المين وجرحي جرحين لست ادري ماذا عساي اقول او ماذا ساحكي غربتني الايام والسنون غرتني البشر والظنون قلبي ينزف ودمعي يجف لست ادري اين المفر والى اين الطريق
تغربت عن اهلي منذ نعومة اظافري بسبب الدراسة وشاءت الغربة ان تلحقي بي اينما انا فكتب القدر ان اتزوج ايضا بعيدا عن مدينتي عن اسرتي تقبلت الامر وحاولت التاقلم لكن غربة البشر هي الداء الذي لم اجد له دواء هو كالعلقم يمر بحلقي فانا عانيت ولازلت اعاني من ظلم اهل الزوج وتغريبهم لي وكلمة البرانية التي لازالت تطاردني رغم انني عندهم منذ 06 سنوات ولا زلت برانية في نظرهم رغم احساني لهم رغم كرمي معهم ووقوفي مغهم في اصعب المواقف لم يستطيعوا ان يمنحوني حبهم ماعساي ان اقول سوى انني ساستسلم للقدر لتفعل الايام مارادت ان تفعل ..................

اييييييييه يا فسحة امل ....موضوع راني عايشاتو عندي زواج 5 سنين ونصف بعيدة عن اهلي وما والفتش بالبلاصة ...زيد فوق بعدي عن الأهل ...ما قدرتش نبعد على عنابة نحس في روحو كيما الحوتة اللي طلعوها من الماء ...وش نقول راهوووووو المكتوب ....وتاني زوجي واهلو من الناس اللي ما يحبوش المرأة تخرج ( يعني غير للضرورة و ماشي وحدها ) وانا اللي كنت ندرس ونخدم ونخرج ....الحمد لله اللي ربي رزقي ب2 بنات يونسو وحدتي ....
وجاب ربي كاين الهاتف راني نهدر مع اختي الوحيدة كل يوم وتاني مع نساء خاوتي لأني يتيمة الأبوين ...أيييه يا يما كون جيتي حية نحط راسي على صدرك ونبكي ....ربي يرحمكم

رانا هنا كرهت البعد و البعد كره مني مي وش راح نعملو نصبرو و خلاص